立法會特別財委會尋日討論勞工範疇嘅開支預算，多名議員關注港珠澳大橋工程接連發生致命工業意外，質疑當局有冇加強巡查同執法，以保障建築工人嘅性命。其中自決派議員劉小麗透露，大橋工程因為死傷事故太多，行內工人都將港珠澳大橋稱作奈何橋，即係通往陰間嗰條，好多人唔敢去大橋工作。勞工處處長陳嘉信死撐佢哋已加強巡查同執法，但承認即使單計大橋香港段工程，由○九年動工至今已發生過九宗致命意外，以及二百三十多宗受傷個案。
