政情：住得近 施俊輝吳清煥做波友
香港人夠晒忙，公餘時想近近哋搵腳打吓波都唔容易。鍾意打乒乓波嘅教育局政治助理施俊輝（Jeff）就冇呢個困擾，佢同中華廠商聯合會副會長吳清煥係紅磡一個私人屋苑嘅鄰居，兩人經常約埋一齊砌波，早兩日佢哋就相約喺屋苑會所打乒乓波，慳番唔少騰出騰入嘅時間。
常到屋苑會所打乒乓波
睇番兩人砌波嘅影片，冇乜抽殺球嘅緊張氣氛，一來一回打得幾有節奏，氣氛好「和諧」。吳清煥形容佢同Jeff夾得幾好，因為佢打波志在出身汗，同Jeff可以來來回回打好多板，運動量夠晒，唔似有啲波友咁打一、兩板就死火。
Jeff就讚吳清煥打得唔錯，佢平時除咗搵呢位街坊兼福建同鄉切磋之外，仲會搵中學同學一齊打。話時話，現時新一屆政府正在籌組新班子，唔知Jeff會唔會順利過渡呢？Jeff就笑而不答，話政府喺適當時間就會公布喇！