政情：頻撲遊埠 劉黃寧達笑談恐襲
今年英、法、俄羅斯接連發生恐怖襲擊，對於成日出埠嘅城中名人來講，應該都幾擔心。國際珠寶設計師協會成員劉黃寧達（Leta）都係空中飛人，經常圍住地球飛嚟飛去，其中每年至少飛英國同埋瑞士好幾次，最近佢就啱啱去瑞士滑雪度假幾個星期。唔知Leta擔唔擔心遇上恐襲？
穿梭歐亞探訪家人
Leta就話驚唔到咁多，最近佢睇過一篇外國文章，話其實死喺自己屋企浴缸嘅人多過被恐襲炸死。佢笑稱諗吓都講得幾啱，所以如果唔好彩遇上恐襲就認命，若然好彩冇事，仲可以影幾張相留念添！真係識講笑！
Leta飛得咁頻撲，皆因佢嘅娘家喺新加坡，夫家喺馬來西亞，女兒就喺倫敦讀書，再加上佢哋喺瑞士有屋，每年都會同夫家親人去瑞士滑雪兼度假幾次，成日穿梭歐亞，真係夠晒忙。