政情：泛民無大將拉布戰收兵
最近幾年嘅四至五月，都係立法會預算案拉布戰嘅開打季節，民主派議員透過提出數百項、甚至上千項修訂，威脅要將該年度嘅財政預算案拖垮，藉此迫使政府落實全民退休保障或其他政治民生議題。有時拉布戰會打到六月先至玩完，令政府出現短暫嘅財政危機。不過，民主派對今年預算案突然鳴金收兵，唔再瘋狂拉布，唔通佢哋忽然間對新任財政司司長陳茂波同新一屆立法會主席梁君彥有所改觀，因而放棄拉布釋出善意？
其實民主派絕對唔會無啦啦大發慈悲，佢哋之所以收兵放棄拉布，原因之一係兵力嚴重不足。喺上屆立法會俗稱為「拉布四子」嘅四名激進泛民議員當中，人力陳偉業經已退休，獨立黃毓民就意外敗選，只剩番社民連「長毛」梁國雄同人力「慢必」陳志全兩人重返議會，綜合「拉力」自然大減。
輿論轉向 效用不彰
最重要嘅係，經過連續多年嘅拉布戰，普羅市民對立法會拉布已由起初嘅少少支持，繼而產生反感甚至厭惡，發展到依家根本係完全冇興趣，傳媒對拉布行為嘅報道愈嚟愈少。再加上立法會主席嘅剪布技巧，亦畀民主派鍛煉到愈嚟愈成熟，拉布行動嘅輿論同實質效用都變得似有若無。據聞慢必今年只會提出數十項修訂，比以往嘅數百項大減，好明顯係拉到冇晒癮。長毛就拒絕透露會提出幾多項修訂，但估計都會少過以前。
姚松炎財案「零」修訂
多名拉布老將出現厭戰情緒，咁一眾本土自決生力軍呢？朱凱廸同姚松炎早前喺財務委員會針對橫洲發展撥款發動拉布戰，差啲搞到大量政府工程被迫停工，不過佢兩個都話，喺立法會大會拉布好難取得成果，寧願集中精力繼續喺財委會拉布，其中姚松炎今次一條修訂都唔會提。照咁講，立法會主席梁君彥應該會偷笑，相信財委會主席陳健波一定會覺得好唔公平囉！