中環出更：悠揚樂韻化解立會干戈
音樂可以陶冶性情，話唔定仲可以化解紛爭。一向爭拗多多嘅立法會，近年成日有學生音樂會，尋日就有英華小學弦樂隊獻技，吸引多名議員駐足欣賞，令到經常劍拔弩張嘅立法會大樓氣氛和諧好多。議員胡志偉見到小朋友演奏就諗起細個嘅日子，佢自言對音樂非常有興趣，過去多次午間音樂會都有參與，不過佢細個時條件無咁好，只可以好似野孩子咁通山走，無機會學樂器喎！
醫學界議員陳沛然亦都有到場欣賞，佢話自己小學四至六年級係合唱團，對音樂都有認識，但就無學過樂器。雖然無機會學樂器，但係佢三個囡囡就幸福得多。
陳沛然三個囡囡學打鼓
陳沛然話，太太安排咗三個囡囡學打鼓，亦有學習親子鋼琴。打鼓？咁喺屋企練習時咪好嘈？陳沛然笑笑口話，囡囡練習打鼓時會用鼓墊，咁就唔會成為噪音，比起小提琴呢啲練習時好容易會走音嘅樂器好得多，仲讚太太安排囡囡學打鼓嘅決定好聰明。
衞生服務界議員李國麟喺中學時期學過拉二胡，不過就自認天分唔高，估計要等到退休先會有時間再鑽研。
講起音樂，議員們都滔滔不絕，聽小朋友演奏樂曲時就齊齊欣賞，仲同小朋友一齊合照，氣氛好似幾和諧。好似平日無咩兩句嘅謝偉俊、航運交通界易志明、旅遊界姚思榮同其他民主派議員都有傾有講，都叫化干戈為玉帛喇！難怪立法會秘書長陳維安話，要搞多啲同類音樂會，增加立法會嘅音樂色彩。
卓妮