政情:劉吳惠蘭率先過渡 續任做到2020

特區政府仍未換屆,但公務員敍用委員會主席劉吳惠蘭已經率先順利過渡,仲會做到二○二○年添!劉吳惠蘭原本嘅任期係做到今年四月底為止,但政府尋日宣布,特首再度委任劉吳惠蘭做公務員敍用委員會主席,任期三年,由二○一七年五月一日至二○二○年四月三十日,仲早過現屆政府過渡。

曾因健康問題而辭任局長

劉吳惠蘭係商務及經濟發展局前局長,佢喺二○一一年以健康為理由辭職,當時有指佢患上結腸癌,其後康復,喺二○一四年接替吳榮奎,出任公務員敍用委員會主席,任期至今年四月三十日。政府尋日公布,特首再委任劉吳惠蘭做公務員敍用委員會主席。

倘再做三年平吳榮奎紀錄

吳榮奎喺公務員敍用委員會最長時間,總共做咗九年主席,而家劉吳惠蘭做完三年又三年,若果佢之後再做多三年就平咗吳榮奎嘅紀錄,係咪真係會咁?大家放長雙眼睇喇!

公務員事務局局長張雲正話,對於劉吳惠蘭繼續出任主席深感欣慰。公務員敍用委員會嘅主要職責,係就公務員嘅聘用、晉升及紀律事宜,向特區政府提供意見。

第一手消息請下載on.cc東網iPhone/iPad/Android/Windows Phone Apps