政情：散光增至兩百度麥美娟變四眼妹
近年智能電話、平板電腦等電子產品愈趨普及，無論男女老幼都好難忍手，難免會出現視力問題。原本冇戴眼鏡嘅立法會議員麥美娟（Alice）近日都配咗副眼鏡，唔知係唔係用得電話多，搞到變成四眼妹呢？
Alice日前戴着眼鏡出席發展事務委員會會議，佢自爆近排散光嚴重咗，有成兩百度，想唔戴眼鏡都唔得。Alice仲話，上一屆啱啱就任議員時只有十幾度散光，但係因為唔影響睇嘢，所以唔戴眼鏡都無問題，點知依家有成兩百度散光，睇文件或電子簡報時，都要矇起對眼先勉強睇得到。
不過戴眼鏡始終唔方便，所以Alice平時出出入入基本上唔戴都無乜問題，通常睇文件時先會戴。所以大家如果想睇到佢化身「四眼妹」，只有等佢開會時候喇！