中環出更：倡建紅隧綠化平台 雷震寰遭港府冷待
紅磡海底隧道一帶嘅空氣同噪音污染嚴重、環境惡劣，相信喺嗰度轉車嘅市民都深受其害。香港理工大學尋日舉行大學院士頒授典禮，獲頒榮銜嘅知名建築師及城市規劃師雷震寰（Alex）趁機喺現場派發一份「綠化平台」嘅宣傳冊子，又呼籲大家以書面或電郵回覆表達對計劃嘅支持。原來呢個環保社區項目遭政府三個政策局冷待，Alex想收集民意向政府施壓，希望為活化呢個「令人沮喪嘅地區」做啲嘢。
身兼綠化平台專責小組主席嘅Alex話，綠化平台位於海底隧道收費廣場上方，由理大北端延伸到尖東海旁，與校園平台及港鐵紅磡站連結起來。由於計劃涉及發展、環保同交通三個跨政府部門，所以提出三年幾以嚟，政府態度消極。佢哋亦試過向特首提交計劃，特首要求發展局跟進，但一樣毫無進展。佢話計劃除咗需要政策支持之外，亦需要資金，估計達六十億元。就算未必全部由政府出資，亦希望放行政策，佢哋先可以再行下一步。
靳埭強師承王無邪
獲頒榮銜嘅仲有蜚聲國際嘅現代水墨畫大師王無邪、中華廠商聯合會副會長史立德同「假髮大王」趙振國等人。知名設計師靳埭強都有到場，原來佢係王無邪嘅學生。當年原本做裁縫嘅靳埭強想學藝術，於是去上王無邪嘅堂，點知課程教嘅係設計，佢就誤打誤撞變成設計師。
史立德就諗起少年時代喺印刷廠當學徒時，一次工傷意外令佢失去三隻手指，後來太太動用僅有嘅積蓄畀佢開印刷廠，總算事業有成。鍾意賽馬嘅史立德就講笑話，其實係爛賭，被太太斬咗手指喎。
卓妮