政情：巫成鋒與「娥」有個約會

娥姐之前邀請Rex出席一個電台節目齊齊論政，至於點解會邀請Rex，佢就話因為娥姐曾經住喺佢所服務嘅地區，所以早喺幾年前佢仲做緊社區主任時兩人已經認識，娥姐當年更不時去辦事處搵佢添，計落佢哋都算識於微時。

娥姐參選時冀得Rex支持

Rex又話，娥姐決定參選立法會時都有同佢講，希望得到佢支持，而娥姐選舉揚名後，更曾WhatsApp轉發自己嘅報道畀佢。被問到同娥姐依家仲有冇聯絡，Rex就耍手擰頭話冇喇。唔知Rex咁講會唔會傷咗娥姐心呢？

Rex同楊岳橋都係八十後，兩個都算係比較後生嘅從政者，睇嚟娥姐同啲年輕議員都特別啱嘴形喎。