跳至主要內容​跳至主目錄​

政情:叫謝偉俊做謝偉銓 張華峯傻傻分不清

人稱「肥老闆」嘅立法會議員張華峯,尋日主持財經事務委員會時就衝口而出,將獨立議員謝偉俊(Paul)認錯,嗌咗佢做建築界前議員謝偉銓(Tony)。

話說喺肥老闆要示意阿Paul發言之前,立法會秘書已即刻提水,同佢講係謝偉俊議員,但肥老闆依然係嗌錯,立法會秘書亦再一次幫佢更正。與此同時,阿Paul自己都忍唔住,講咗句「係謝偉俊呀!主席。」之後肥老闆先改番口。其實都唔怪得晒肥老闆嘅,因為阿Paul同Tony都係戴眼鏡,再加埋個名只係相差一字。

嗌錯「政府法律顧問」再甩轆

唔單止嗌錯名,喺會上當財爺拒絕回應四名議員發言之後,肥老闆就話要諮詢法律顧問意見先再開會。一恢復會議嗰刻,肥老闆想請法律顧問回應,點知就口快快噏咗「政府法律顧問」。立法會秘書即刻變得激動,糾正佢係「我哋嘅法律顧問」,仲一連講咗三次「立法會」,肥老闆之後先改正。肥老闆喺副主席、會計界嘅梁繼昌同立法會秘書提醒下都搞成咁,唔知係咪因為太早開會,所以搞到連番甩轆呢?

第一手消息請下載on.cc東網iPhone/iPad/Android/Windows Phone Apps

人人做記者
爆料方法 :
爆料熱線: (852) 3600 3600電 郵: news@opg.com.hk網上爆料
傳 真: (852) 3600 8800手機網站: m.on.cc
SMS: (852) 6500 6500MMS: ireport@on.cc
本網站已採納無障礙網頁設計。如閣下對此網站在使用上有任何查詢或意見,請以下列方式聯絡我們。 電郵 : enquiry@on.cc
東方日報香港人的報紙 必然首選 連續49年銷量第一