中環出更：步操上門兼開咪 示威者轟漢奸黎罪人
再有示威者無懼禁制令頒下，尋日以「步操式」踩上壹傳媒黎智英（漢奸黎）寓所外抗議，並開咪大叫口號，轟漢奸黎黑金亂港及千古罪人，要求嚴查黑金，不容姑息。
二十七名聲稱自發嘅人士尋日朝早約七時四十五分，喺距離漢奸黎位於何文田嘅寓所一分鐘步程位置開始「步操」，部分人士備有小型擴音器，並大叫「罪人禍港」等口號，佢哋又手持印有「黑金亂港 佔中黑手 亂港秧（殃）民 千古罪人」、「嚴查黑金 不容姑息」等字樣嘅橫額。
喺抵達漢奸黎寓所後門附近位置時，示威者關上擴音器，再走到寓所門外作無聲抗議，直至九時左右，示威者開始陸續離去，並喺後門附近位置再度開咪叫口號，及後「步操」離開。
擴音器播聲討口號
及至中午十二時四十分左右，該批示威者再折返示威，佢哋起初只拉起橫額及高舉紙牌，未幾一名示威者把擴音器藏喺膠袋內，並播放聲討漢奸黎禍港嘅口號後，示威者和平散去。
近期針對漢奸黎嘅示威行動不絕，自六月十日起計，至今已踏入一百七十九日，連同尋日嘅行動在內，到漢奸黎寓所及將軍澳壹傳媒大樓外示威嘅行動最少達一百零七次，當中自稱霸王國際集團員工及苦主佔十次、正義聯盟佔三次，旅遊業界及其他人士則有九十四次。
卓妮