中環出更：浪漫異國戀 雷怡暉情迷意男
由城中一班超級跑車迷組成嘅M超跑會，早前喺石澳高爾夫球會舉行晚宴提早慶祝聖誕。M超跑會主席馬仁威話，佢哋成員都係鍾意意大利式生活品味嘅人，成立後好多朋友都想加入，所以當日亦向首批加入嘅榮譽會員頒發證書，包括九巴後人雷怡暉（Amanda）等人。Amanda笑稱自己勁鍾意意大利，仲曾經有位意大利男友添！
Amanda話呢位男友係喺上海工作時相識，大讚意大利男人好浪漫，大情大性，好啱佢。不過後來男友返意大利，兩人分隔兩地難以維繫感情，最終都分咗手。講起開超跑，佢話以前成日開爸爸嘅跑車，喺石崗或公司嘅工廠玩，但不時撞到架車花晒，被爸爸鬧喎！依家大個咗錫身啲，所以少開跑車。
張偉強返工開電動車
M超跑會創辦人之一、律師張偉強同永遠榮譽會員呂孟雄講起玩車趣事，笑料百出。廿幾歲就開始玩法拉利嘅呂孟雄話，最高峰時曾擁有十架車，記得有次佢想再買架法拉利，但就被老婆鬧。佢辯稱呢款車係佢細個嘅Dream Car，點知老婆費事同佢嘈，寫封信畀佢，話若佢堅持要買就離婚喎！不過最後佢都係氹掂老婆，買咗。張偉強話依家返工都係開電動車，跑車就變成藝術品，得閒撻吓引擎享受咆哮聲就算喇！
同場仲有人頭馬協祥公司私人客戶總監雷凱竣，佢亦有份創辦M超跑會。雷凱竣好鍾意食雪茄，遲啲將同一班好友去古巴參加雪茄節，笑稱要趁仲未好多人去之前去睇吓喎。
卓妮