政府即將就退休保障同強積金對沖問題提出具體方案，工聯會會長林淑儀尋日喺電台表示，多個政黨同團體都支持推行全民退休保障，依家只欠政府支持，建議政府將現有逾二千億元嘅未來基金，撥作退休保障基金，之後政府再每年注資一百億元，咁樣相信個基金營運到二○六四年都唔會有問題。其實退休保障正係照顧香港人嘅未來，動用未來基金聽落似乎好合理，唔知創立未來基金嘅財政司司長曾俊華同唔同意呢？
