政情：老鴿聯署游說卿姐連任主席
民主黨（白鴿黨）下月初將會舉行會員大會選出新任領導層，由於現任主席劉慧卿（卿姐）傾向唔再角逐連任，副主席「乳鴿」羅健熙成為新任主席大熱門。不過，主席之爭近日出現暗湧，一批資深黨員發起聯署提名，希望說服卿姐競逐連任，同時亦有另一班中青代，希望推舉立法會議員胡志偉出任主席，大佬輩嘅夾攻下，羅健熙似乎都係「一場歡喜一場空」，出任主席無望，白鴿黨亦換班不成。
白鴿黨部分資深黨員包括徐漢光、離島區議員郭平、沙田區議員鄭則文等，日前發信畀黨友，發起黨內聯署提名卿姐出選新一屆黨主席，並希望透過聯署顯示黨友對卿姐連任嘅熱衷，說服佢出選。信中力陳卿姐四大好處，包括經驗豐富、「在政治、媒體、社交和國內外各方面，有深厚的網絡和備受尊崇的聲譽」、以及「打破大佬文化」等，又認為黨內世代交替不可操之過急，要求卿姐做多一屆。
副主席位亦有惡鬥
有黨內人話，雖然班資深黨員盛意拳拳，但卿姐已表明要退下來，睇唔到佢參選嘅誘因，佢估計黨主席會係羅健熙同胡志偉之爭，目前形勢係「五五波」。除咗黨主席，該黨亦會喺同一日選出副主席同中委會成員，目前該黨司庫袁海文同資深黨員林子健都表明有意角逐副主席，睇嚟會有一番惡鬥。