政情：議席危危乎 小麗騰騰震
青年新政游蕙禎同梁頌恆因為辱華宣誓風波，被法院裁定取消立法會議員資格，而「龜速」宣誓嘅民主自決派議員劉小麗（小麗）亦都危危乎，隨時同游梁一樣被踢出立法會。可能知道自己就快失業，小麗呢排連番甩轆，繼開會好似遊魂咁問錯問題後，尋日簡簡單單選小組委員會主席，佢都好似神不守舍咁蓋錯印，難免令人覺得佢好似hea做咁喎。
話說尋日監察西九文化區計劃推行情況聯合小組委員會選正、副主席，小麗唔止遲到，仲喺投票選主席時蓋錯印，差啲就投咗畀民建聯嘅劉國勳，好彩佢及時「回魂」，大叫「我扱錯印呀」，然後先慢慢攞過張飛重新蓋印，如果唔係就真係「恨錯難返」。
解畫稱團隊經驗淺
之後，小麗為近日連番甩轆解畫，話自己係新議員，加上議員助理嘅議會經驗亦較少，暫時都仲只係好新嘅團隊，不過佢一直有就唔同事務同其他議員溝通交流，期望自己之後可以發揮得更好。佢又乘機抽擊特首梁振英，話明白社會有嚟自「梁振英同佢背後集團」帶來嘅動盪，之後會好好準備，唔會懼怕呢啲挑戰。
咁啱尋日有消息傳出，指CY已反守為攻，要求律政司研究覆核小麗嘅議員資格，但小麗就似乎唔多想理佢，話呢啲都係CY想將民主自決派嘅議員逐個擊破，想消散大家士氣嘅手段，大家都唔應該中計，仲話無論結果點樣都要堅持理念、堅強咁面對，坦然無懼就已經可以。至於有啲乜嘢部署、請咗邊個做律師、夠唔夠錢打官司等問題，佢就一概唔肯回應，話要容後再商議，暫時亦都唔想多諗，最緊要係喺現有席位上好好發揮。睇嚟佢都冇乜法寶可以出嘞！
革職回水 「到時先算」
另外，佢喺競選時曾向選民承諾，當選後每個月都會捐一半議員薪金，成立一個社區組織做服務工作同關注政府政策，但上任個幾月一直被網民炮轟佢得個講字，網上亦有唔少「追數」貼文。佢就話十月份嘅糧出咗之後兩個星期，已先後捐咗錢畀三個社區組織（平等分享行動、女工會、社區發展組織），夾埋捐咗成四萬八千蚊，超過佢份糧嘅一半，又解釋之前未向外公布，只係想捐好晒錢先向公眾交代啫！
依家佢自身難保，仲要每個月都捐幾皮嘢出嚟，如果之後畀人取消資格，回水嗰陣要唔要賣咗自己兩層樓填氹呢？佢就話到時先算喎。