去車展唔一定係睇車，因為有啲人係為咗睇車模。大家都知南韓嘅車展出名係索爆車模集中地，能夠喺當中成為焦點，外形必定相當出眾，而每逢有呢位車模現身嘅車展，總會吸引眾多目光，佢就係超人氣車模金藝河。
喺南韓首爾出生嘅金藝河，不但擁有高挑嘅身材，而三圍更係相當有觀賞性，尤其係一對大小恰到好處嘅美乳，經常成為男士嘅焦點。其實早喺佢就學時期，已經擁有出眾嘅外形，只係當時佢並未諗過會喺模特兒界發展。畢業後，佢投身模特兒界，除咗接受培訓外，亦開始模特兒工作，喺2012年首次以車模身份喺釜山嘅車展登場。作為新丁嘅佢，雖然名度唔高，但憑藉出眾嘅外形以及親切感，令佢嘅名字愈嚟愈多人認識，工作亦接踵而來，喺各個車展中為唔同嘅汽車品牌站台。
講到佢真正為人所熟悉，就要數到2014年時參加賽車模特兒比賽，佢不但喺大家面前展現出極具親和力嘅美貌，同埋誘人無比嘅身材，更喺表現環節展現出冷艷嘅一面。一冷一熱嘅兩種味道，同時帶畀大家驚艷嘅感覺，結果佢獲得最上鏡獎。自此之後，佢人氣急升，除咗踩入賽車場化身成車隊嘅賽車女郎外，甚至成為車隊嘅專屬模特兒。頻繁嘅出鏡率令佢喺網絡上嘅人氣隨之飆升，從此成為南韓超人氣車模。
隨住佢喺車模同賽車場上嘅人氣不斷攀升，佢亦開始將模特兒工作擴展至時裝模特兒領域，除咗為唔同嘅時裝拍攝平面廣告外，又化身成型格模特兒為唔同嘅商品拍攝照片。有人問佢喺眾多嘅模特兒工作中，最享受邊種類型嘅工作時，佢諗都唔諗就話一定係賽車女郎。點解呢？須知道賽車女郎要喺戶外工作，可以話日曬雨淋，都咪話唔辛苦。原來佢骨子裏唔單止係個愛車之人，更對賽車有相當熱情，佢笑稱每次企喺賽車旁邊時，都會有種衝動坐入車廂中，駕駛極速戰車。
佢仲話做賽車女郎嘅好處，就係可以乘機請教車手嘅駕駛技術，等自己提高技巧。正正係因為佢熱愛車模呢份工關係，縱然工作排得滿滿，但係每次上到場或展台，都會以最佳狀態示人，以回報入場睇比賽或睇車展嘅觀眾。問到佢對未來嘅發展，佢笑稱如果有機會嘅話，希望能夠以專業車手嘅身份參賽。
簡介：有人話男人認真工作時個樣零舍有魅力，同樣，女人認真投入工作時亦別具吸引力，金藝河每次演出都會抱着認真嘅態度去做，加上佢好享受工作，自然表現得更加出色，而佢冷熱皆宜嘅形象，每次都帶畀大家唔同嘅感覺，試問呢種迷人女郎點會唔受歡迎呢？想欣賞佢更多靚相，就要Click上呢個網站啦！
網址：http://www.pictaram.com/user/kim.yeha/566931210
出生地：首爾
身高：173cm
三圍：33、23、34
撰文：魂