話說全國人大常委會副秘書長李飛日前講解釋法內容時指出，香港有人提倡「民族自決」，本質都係港獨，意味喺競選及宣誓時提倡香港自決嘅多名非建制議員，包括劉小麗、朱凱廸同羅冠聰等，隨時都會因釋法而喪失議員資格，仲可能要嘔番自上任後支取嘅巨額薪酬同津貼開支。劉小麗同朱凱廸唔單止震騰騰，尋日仲先後澄清，話佢哋提出嘅係「民主自決」，背後係爭取民主，冇排外思想，並唔係「民族自決」，即係唔支持港獨，佢哋依家急急劃清界線，好明顯係淆底，驚被指係港獨而「搣柴」喇！
