政情：沙田交運會流會 容溟舟炮轟
近月立法會唔係流會就休會，估唔到風氣蔓延到區議會。沙田區議會交通運輸委員會（交運會）尋日進行咗六個多小時嘅車輪式會議之後，接近晚上八點半因為人數不足而流會。交運會副主席容溟舟就大鬧，政府代表出席會議時預備不足，浪費議員時間，最後更搞到流會收場！
斥政府代表預備不足
沙田區議會交運會尋日兩點半開會，容溟舟大鬧出席會議嘅政府部門預備不足，文件欠奉，令本來只係開四個鐘嘅會議搞到六個鐘都未完成，由於部分區議員傍晚要出席地區活動，捱到八點半最終因人數不足流會。佢又話今次議程樣樣都係大鑊嘢，好似討論沙中線安排，同埋社區重點工程嘅封路安排等，希望部門下次開會時做好預備。
容溟舟又質疑政府部門唔做好預備工作，令區議員唔支持議案，變相可以做少好多嘢。其實過去區議會都好少出現流會或人數不足，但隨着區議會愈嚟愈政治化，今屆會期開始就不時出現流會嘅情況，同立法會一樣，真係好學唔學，衰嘅學到足喇！