政情：又飛美國 鋒狂唱衰香港
香港眾志秘書長黃之鋒作為香港學生運動嘅代表，周不時都有組織邀請佢去外國訪問，不過並唔係個個地方都歡迎佢o架，好似上月佢去泰國時就被當地警方拒絕入境，兼拘留喺俗稱「臭格」嘅機場羈留室，都令佢擔心自己會「被失蹤」。估唔到，黃之鋒見過鬼都唔怕黑，事隔一個月又再去美國參與高峰會，仲揚言會向國際社會講人大釋法係「僭建《基本法》」添，明顯係唱衰香港喇，真係唔識死！
與流亡維權律師舉行討論會
全國人大常委會喺日前就《基本法》有關宣誓嘅條文釋法，黃之鋒嘅黨友羅冠聰更有可能因為支持自決、兼且喺宣誓時特登將誓詞讀到走音變成疑問句，亦可能因而被指宣誓唔莊重而被取消議員資格，喺呢個風頭火勢嘅時候，黃之鋒就事不關己，闊佬懶理，竟然飛咗去美國。
尋日佢喺Facebook上話自己獲邀到美國出席一個高峰會，仲已經上咗飛機添！佢話首站會去美國佛羅里達州邁阿密，聽日就會同流亡海外嘅維權律師滕彪，以及人權觀察組織全球倡導總監Minky Worden舉行討論會，內容主要關於香港同中國嘅人權狀況及民主進程。
多次促外國勢力干預港內政
黃之鋒又話周末將會去紐約同華盛頓，與當地嘅香港人、學者、民間組織會面，連結海外公民社會，講解吓「民主自決」理念。更加重要嘅係，佢會推動國際關注中央釋法、破壞香港司法獨立、讓《中英聯合聲明》嘅承諾淪為一紙空文嘅問題，可能佢擔心自己未必受歡迎，抑或仲有其他考慮，所以佢並無透露具體行程。
其實黃之鋒去外國唱衰香港已經唔止一次，而且次次都會要求國際社會干預香港內政，今次更加表明要「讓國際社會知道香港失去自決權的歷史」，真係唔知有乜嘢居心？