中環出更：逾80萬選舉開支 司馬文自付
立法會選舉落幕兩個多月，各參選人陸續向選舉事務處遞交選舉開支資料。退出公民黨同民主思路後，以獨立候選人身份出選港島嘅司馬文，選舉中途為成全民主派取得港島區最尾一席，自行宣布棄選，佢早前已遞交選舉開支，整場選舉共花費逾百萬元，扣除佢收到嘅十六萬元選舉捐贈，餘下嗰八十幾萬元唔係小數目。佢嘅助理回覆話嗰八十幾萬元開支全數由司馬文「自貼」，又指佢早已有心理準備，冇後悔參選，暫時亦冇計劃要作任何行動「填氹」。
同樣出選港島區，另一名獨立侯選人沈志超以一千六百五十四票低票落選，而佢申報嘅選舉開支為五十二萬元，期間並沒有收受任何選舉捐贈。
蔣麗芸花百幾萬
另外，分別喺九龍西同區議會（一）當選嘅民建聯（民記）蔣麗芸同劉國勳，佢哋嘅選舉開支分別係百多萬元及三萬二千港元。蔣嘅選舉開支全數由民記捐贈，而佢又申報指其團隊因為未經許可喺公眾地方懸掛選舉宣傳品，被食環署人員拆除，之後被追收千多元；劉國勳嘅選舉開支則全數由黃建源以個人名義捐贈。黃建源為民記現任司庫。
卓妮