政情：八網難逃：劉小麗未能宣誓 蔣麗芸指「天譴」

阿Ann尋日喺facebook上分析小麗三次宣誓，佢話小麗第一次係因為自己發假誓，所以宣唔到誓；第二次就因為個姓太多筆劃，搞到姚松炎宣完誓之後，建制派製造流會，令小麗受牽連宣唔到誓。至於第三次，阿Ann認為係小麗隊友、一眾非建制派議員估計錯誤搞到第三度宣唔到誓。

引阿涂「天意論」解釋

之後阿Ann引述咗老人家嘅說話，指發假誓嘅人必遭天譴。佢仲引埋阿涂嘅天意論，解釋小麗宣唔到誓係因為天意。莫非阿Ann暗示，小麗係因為第一次發假誓，所以「天意」就要佢直到依家都宣唔到誓呢？

青年新政梁頌恆同游蕙禎嘅司法覆核案將會喺下周四開審，相信下周三立法會應該又會立立亂，莫非真係天意難違？