政情：周樹堂練氣功 沉香撲鼻
唔同木材有唔同嘅香氣，講到最矜貴嘅應該要數沉香喇。話說周大福創辦人周至元兒子周樹堂，近期同兒子周康維搞沉香首飾生意，講起童年時點樣與沉香結緣，周樹堂就話細細個媽媽因為信奉佛教，不時會燒沉香，每次佢哋聞到沉香就會喺門罅偷睇，此情此景至今仍然歷歷在目。
其實沉香除咗用嚟燒及作中藥外，練氣功嘅人亦相當鍾愛，事關每次聞到沉香氣味都會令人感覺平靜。周樹堂仲透露，哥哥練氣功已經練到好高層次，記得九十年代初佢哋仲成家二十幾人於家中上堂學氣功添！
周康維設計沉香首飾
不過，點解會諗到將收藏割愛變成飾品出售呢？周康維就話，因為佢喺加拿大長大，對沉香印象及回憶冇父親咁深，但係有次於網站見到有外國明星賣有沉香氣味嘅飾品好受歡迎，既然屋企有咁多沉香，賣真嘅仲好啦！但要令年輕人愛上呢種陌生嘅木材並唔簡單，讀番書嘅周康維就諗到將沉香同十二月誕生石「綠松石」及純銀等混入設計，配搭夠晒新鮮。