政情：公民講場：宣誓獲放生 小麗未甩難

上星期建制派為阻止青年新政梁頌恆同游蕙禎再次宣誓，發動離場製造流會，令到排喺梁游之後、疑被「放生」嘅劉小麗亦無法再宣誓，有講法話係小麗自討苦吃，亦有講法話係殃及池魚。不過，苦等一星期，立法會主席梁君彥尋日終於決定容許小麗今日再宣誓，不受梁游押後宣誓所影響。雖然小麗鬆一口氣，亦算係執番身彩，但好多建制派及愛國人士仍對佢極為不滿，其中曾就梁游宣誓提出司法覆核嘅城大學生莫嘉傑，尋日就再入稟阻止小麗再宣誓，睇嚟小麗想正式就任議員仍存在風險。