政情：公民講場：做「班長」拉隊走人 克勤仔冇甩轆

新一屆立法會會期開始，俗稱「班長」嘅建制派召集人由商界廖長江及民建聯陳克勤（克勤仔）聯手擔任，之前唔少人都擔心克勤仔未夠老謀深算而難以勝任。不過，尋日建制派首次發動流會，就由克勤仔負責擔大旗要求點算法定人數，佢喺姚松炎宣誓時就已經企定起身，等姚一完成宣誓就立即要求主席點算法定人數，雖然佢將「點算」講咗做「清算」，但都叫順利完成冇甩轆。不過，克勤仔坦言事前都有啲驚，所以要做足準備，總算不負所託。