政情：轉做青政義務顧問 梁天琦怕被攻擊？
本土民主前線（本民前）梁天琦雖然被取消參選立法會資格，但佢全力助選嘅「Plan B」青年新政梁頌恆就成功當選。本報曾經報過，梁天琦已答應擔任梁頌恆嘅議員助理，負責代表港獨人士參與外國研討會，但梁天琦尋日接受訪問時就改晒口。
免除賺公帑搞港獨質疑
梁天琦本人亦曾經講過會考慮出任梁頌恆議員助理，但依家就改口話會以顧問形式義務協助青年新政。佢解釋，因為自己唔擅長文書工作，加上有進修嘅打算，所以希望將議員助理嘅職位留畀更多有能力嘅人咁話。
其實立法會議員助理薪金由公帑支付，如果梁天琦真係出任，變相用公帑利用議員助理身份喺立法會搞港獨，唔知佢今次改變主意，係咪想釋除坊間嘅疑慮、免被攻擊呢？