政情：長髮捱批 卸落政府 游BB：派少啲膠
立法會前議員何秀蘭前日喺facebook（fb）借本土派青年新政立法會議員游蕙禎（游BB）關注港人搵唔到房「扑嘢」嘅言論抽水，繼而指摘游BB長髮唔環保。經過一晚沉澱後，游BB尋日喺fb貼文，既冇反擊何秀蘭，亦承認有用洗頭水同護髮素，仲分享自己選購潔膚用品心得，指坊間不少潔膚品含有不可分解嘅微膠粒，將矛頭轉向政府嘅環境政策不力，仲tag（標籤）「派少啲微膠粒」。
游BB喺fb話自己一把長髮留咗好耐，當然有用洗頭水同護髮素，但究竟佢用咩牌子，佢就話唔記得，但又話隻牌子用咗好耐，仲係超市買唔到嘅添，認真神秘。其後佢將話題提升到環保層次，指近年本地興以手工皂或茶粉等有機產品，希望取代超市可買到嘅洗髮沐浴產品，減少生態污染，所以應從政策層面入手，希望從源頭減少污染，所以佢必定會喺立法會阻截破壞生態的工程，指減少微膠粒污染，人人有責。
星星躺着中槍
呢番言論明顯借機批評政府環境政策不力，矛頭直指環境局局長黃錦星（星星），星星一直推展源頭減廢，當中遇到不少阻力，而推出嘅多項政策亦唔湯唔水，現時有注重環保嘅游BB在立法會「督促」下，對星星來說究竟是福是禍呢？