政情：吳永嘉兩議助人工 廠商會贊助
新一屆立法會議員利益申報資料陸續放上立法會網站，最新就有工業界（二）吳永嘉（Jimmy）及教育界葉建源。Jimmy申報有兩項受薪董事職位，以及一項律師事務所合夥人。不過，最特別就係佢獲得中華廠商聯合會（廠商會）贊助兩名員工嘅月薪喇！
Jimmy話，兩名議員助理月薪由廠商會贊助，呢個方式能夠體現到佢同廠商會有更強嘅聯繫，亦都反映到其意見能夠同廠商會較為貼近。其實Jimmy可以就議員助理薪金向立法會申領津貼，但佢就搵廠商會贊助，真係幫政府節省公帑喎！
公文袋捐葉建源一蚊雞
另外，葉建源竟然申報獲得公民黨捐贈，而金額竟然係港幣一蚊！葉建源就話，選舉期間曾同幾位專業功能界別候選人一齊舉行記者會，而當時需要發放採訪通知而變相有一元嘅選舉經費。而佢亦最新申報擔任教育大學卓越教學發展中心客席講師，但佢話仲未開始教書，因為並非經常性工作，遲吓有課程就會幫手喎。