政情：財經局甩轆 仲搵「方剛議員」
從事政治工作，一定要緊貼及關心時事，而熟悉立法會，更係行政同立法關係嘅重要一環。繼早前教育局局長吳克儉（吳得掂）甩轆，祝賀街工梁耀忠當選教育界議員後，呢股甩轆兼未瞓醒嘅「病毒」蔓延至財經事務及庫務局。據聞財經事務及庫務局局長政治助理趙必立（Philip）竟然喺選舉後，邀請冇競逐連任嘅立法會批發及零售界前議員方剛加入新一屆立法會財經事務委員會！
邀入委員會 趙必立認戇居
據悉，立法會選舉後，Philip曾致電詢問「係咪方剛議員辦事處，方剛入唔入財經事務委員會？」接電話嘅人話佢知，立法會選舉已經完結，方剛冇競選喎，認真（火羅）爆！Philip經查詢後承認，曾經致電畀各議員辦事處或議員助理，了解議員會唔會有意思加入相關委員會，點知整理電話簿嘅時候，只係加入新議員嘅電話，而冇刪除舊議員嘅電話，結果就出錯。
Philip又話，致電方剛辦事處當日，總共打咗幾十個電話，所以每個電話對話第一句都有如錄音機咁問，有時打咗個電話號碼先睇吓打咗畀邊個，承認曾經打過畀前議員嘅助理，形容自己戇居，快手得滯，無意引起誤解，下次見到嗰位前議員時，一定會同對方講唔好意思，亦會整理好電話簿，唔會再犯同一錯誤。好彩今次只係問對方會唔會加入委員會，如果係向建制派「通水」但打錯畀泛民議員就大件事喇！
方剛氹掂張宇人掌自由黨
講起方剛，佢所屬嘅自由黨早前宣布由飲食界議員張宇人出任主席，方剛認為主席位唔應該懸空，應該由四位議員中選出，又透露係自己氹張宇人做主席，佢送晒自己間房啲糖果氹掂對方。至於曾經係自由黨成員嘅新民黨副主席田北辰（田二少）近日與主席葉劉淑儀存在意見分歧，被問到如果田二少重返自由黨係咪可行，方剛就話如果田二少返嚟好大件事，佢坦言頂唔順田二少，因為對方開會好長氣喎！