政情：譚文豪踢爆新空管資訊混亂
據報民航處最快於月底啟用問題多多嘅新空管系統，本身係民航機師嘅新任立法會議員譚文豪（Jeremy）尋日同傳媒茶敍時爆料，指新空管嘅問題係顯示屏上飛機資料會有重疊嘅情況，令當值人員唔能夠清楚知道航班資訊；除此之外，當值人士亦可能因為顯示屏顯示部分非重要資訊而分心，就此，Jeremy表明會於立法會層面跟進新空管問題，希望可以及早解決有關問題。民航處回應傳媒查詢時重申，新空管系統只會喺系統及操作人員準備狀況均達至最高水平後，才會全面投入運作。
快將調職 不再「離地」
另一方面，Jeremy透露快將不再「離地」，講緊係本周末完成最後一飛後，下周調職至處理空勤人員管理，其薪金亦會按比例遞減，佢計劃未來每三個月會抽數小時進行模擬駕駛訓練班，以維持其機師牌照所需條件，又希望考取小型飛機教官牌照，教授青少年駕駛小型飛機。
此外，根據Jeremy已提交議員利益申報，據知佢分別於九龍、新界、中國和美國持有物業，佢自爆有一個舖位因需要查證仍未申報，就係其太太同親友於一個商場合資舖位，佢承諾會向秘書處補交相關資料。