政情：黃偉明訪美領館避談兒子黃之鋒

香港眾志秘書長黃之鋒被拒入境泰國，期間一度被扣留十多小時，黃之鋒嘅黨友、立法會議員羅冠聰表明會喺立法會層面跟進事件，而事有巧合，黃之鋒爸爸黃偉明尋日現身美國駐港總領事館，莫非趁機為黃之鋒伸冤？

其實一切都係美麗嘅誤會，黃偉明尋日下晝四點聯同多人到領事館，會見美國人權特使Randy Berry，佢強調同美國人權特使會面時無提及黃之鋒，當問及兒子被拒入境泰國嘅遭遇，黃亦不願多談事件，僅稱「有啲乜嘢你哋直接打畀佢（黃之鋒）問啦！」

言歸正傳，黃偉明話喺尋日會面上，美國人權特使似乎唔清楚香港嘅性傾向歧視條例內容，而對方承認曾見過香港支持同志平權運動嘅立法會議員，同時表明唔想影響香港有關立法進程，之不過，黃偉明始終認為今次事件冇咁簡單喎。