有個笑話係咁嘅。新沙士肆虐南韓期間，一名女病人從醫院走甩咗，當局登照片通緝，結果警方根據事主容貌，話咁快就拉咗五百人。南韓整容技術獨步全球就話容易「撞面」啫，兩個身材樣貌完全唔同嘅大男人都可以搞錯，咁又點解釋呢？
話說《明報》七月刊出一則題為《涉摑曲棍球隊友致４成耳膜破損 退休警司襲擊表證成立》嘅報道，點知喺刊出被告照片時張冠李戴，將同一張照片內嘅大律師錯誤標示為被告，就咁樣一登登咗四十分鐘，明報即時新聞網至如夢初醒，作出更正。事隔近兩個月，佢哋尋日再喺網站及報章刊登「更正與澄清」啟事，向涉事大狀及讀者致歉。《明報》如果唔係道歉，堂堂大狀畀人指指點點，以後仲使出嚟行嘅！
冇計喇，一件污，兩件穢，三件無所謂。咪睇《明報》成日吹噓自己係「知識份子報紙」，懶高格調咁，實際上烏龍百出，類似「大狀當被告」嘅低級錯誤，數到天光都數唔晒。最經典係有年明報即時新聞網報道特首等高官出席十‧一升旗儀式及酒會，居然話「特首稍後將辭職」，引起一片嘩然，謎底兩個鐘後揭曉，原來特首唔係「將辭職」，而係「將致辭」，結果又係道歉收場。當年北京奧運閉幕禮，英國球星碧咸明明喺雙層巴士上一腳踢走個波，明報即時新聞網咁都可以添油加醋，話碧咸由巴士跳落嚟，一路踢波一路衝向人群，真係唔到你唔服。
《明報》擺烏龍當食生菜，唔怪得一年閒閒哋刊登幾十甚至上百次「更正與致歉」。佢哋之前雞乸咁大隻字喺報頭旁邊自我貼金，話咩「公信第一」喎，「第一」就「第一」嘞，不過係「烏龍第一」咁解啫。
講開「公信第一」，唔知係咪因為商品說明修訂條例已經生效，有啲人吹水唔敢吹得太離譜，所以一早已經靜雞雞自我搣柴。當然喇，有諸內，形諸外，《明報》內部鬧劇多多，一時員工集體抗議高層被炒，一時專欄作家「開天窗」，亂過亂世佳人，想唔出事都幾難。一份《明報》係咁，《蘋果日報》老作新聞，反中亂港，罪行更係罄竹難書。日前有大學調查本港傳媒公信力，傳統收費報章整體得分再創新低，呢啲咪累人累物累街坊囉！
好多人都知美國前總統傑弗遜重視第四權，講過「寧要報紙不要政府」嘅經典名句，其實佢仲講過，唔睇報紙嘅人比睇報紙嘅人知道得更多，講緊嘅唔知係咪《明報》同「爛果報」呢類報紙囉！