政情：懶執相劉國勳妻拒影寫真
新一屆立法會多咗好多後生仔，其中一個係自動當選區議會（第一）功能界別嘅北區區議員劉國勳（阿勳）。阿勳太太呂迪明本身係香港演藝學院畢業，主修表演，一直以來都從事表演工作，後來從政。有日講笑問佢會唔會好似啲女星咁，趁青春出番本寫真集玩吓呢？呂迪明就耍晒手話唔會，又話自己向來好懶，又唔係好鍾意影相，就連平時嘅宣傳單張都懶得執相，所以對影寫真興趣不大喎。
演藝畢業後教話劇
呂迪明話，佢喺演藝學院畢業頭幾年都有參與幕前演出，但因為始終要「搵食」，所以之後都喺小學教小朋友演話劇。黨內有需要搵佢演出，例如唱吓歌、做司儀，佢都好樂意去做，但叫佢影相就麻麻哋喇。佢又話，平時同阿勳放假去街，都只係會影食物，加上自己唔多注重形象，所以都費事影。見呂迪明經常紮起長髮，原來佢都想剪短髮，但被身邊朋友喝止，驚佢變男仔頭，剪咗短髮要去男廁喎，搞到佢唔敢剪短髮。