政情：唔撈議助 陳倩瑩赴英讀碩士
佔領行動結束至今已經兩年，就連立法會都換屆，到底班學運領袖未來去向係點？曾任民陣召集人及學聯秘書長的陳倩瑩（Daisy）之前擔任社福界議員張國柱助理，但隨住張國柱退下火線，Daisy都同樣暫別香港，去英國進修。
張國柱偕妻歐遊十多日
Daisy成功取得志奮領留英獎學金（Chevening），將於本月中飛去英國華威大學，修讀國際政治經濟碩士學位，預計會讀一年，但未有打算諗之後做咩工作。Daisy嘅前老闆張國柱就會喺任期完結後，同太太跟旅行團去西班牙同葡萄牙玩十幾日，返港後打算做吓義工喎。
其他學運分子去向又點呢？除咗做過學聯常委同秘書長嘅香港眾志主席羅冠聰，剛當選成為「最年輕立法會議員」外，前任秘書長周永康就會同Daisy一樣去英國進修，但佢會去倫敦政治經濟學院，修讀城市設計及社會科學碩士。至於分別做過學聯副秘書長同常委嘅岑敖暉同梁麗幗，據知仲未畢業。