政情：想做立會主席 郭偉強「得個恨字」
立法會主席爭奪戰展開，人選滿天飛，成功轉戰香港島直選嘅工聯會郭偉強亦風騷加把口，指大會主席傳統由香港島直選議員擔任，暗示自己是「真命天子」。曾擔任立法會主席的范徐麗泰和曾鈺成，無獨有偶都係循香港島直選進身立法會。 按照郭偉強嘅講法，撇除非建制派，今屆主席將由新民黨葉劉淑儀，民建聯張國鈞同佢先有「資格」擔任。不過，睇怕郭偉強嘅預測相信會落空喇。
未夠40歲唔夠秤
首先，葉劉已斬釘截鐵講明唔會擔任立法會主席；至於張國鈞啱啱先係「一年級學生」，亦冇可能勝任。難道「真命天子」係郭偉強？非也！原因係佢未夠秤！原來郭偉強今年只得三十八歲，未及主席要四十歲嘅門檻，所以唔夠資格成為主席候選人。郭偉強笑指主席候選人嘅歲數門檻應該下降，因為來屆預期拉布更嚴重，如主席年紀太大，將會好辛苦喎。不過，如果搵個年紀細嘅人做主席，可能一樣咁辛苦喎！
另外，工聯會未來將會少一個議席，如何分配人手參加事務委員會成為難題。郭偉強話唯一方法係人人多走一步，他打算在來屆參加八個委員會，較現屆多一個，又話已經係能力上限。