政情：本土 泛民 無揀定 姚松炎兩面逢迎？

要求與羅冠聰朱凱廸同層辦公

本土自決派一共取得六個直選議席，其中功能界別當選嘅姚松炎一直無將自己定義為任何陣營。追溯姚松炎嘅從政經過，喺選舉前曾經與主張自決嘅候任新界西議員朱凱廸及九龍西議員劉小麗合組聯盟「香港列陣」，雖然聯盟最後泡湯，但姚松炎政治理念上明顯支持自決。後來佢又加入咗泛民功能界別議員合組嘅專業聯盟，似乎佢為咗搵盟友，不斷喺泛民同本土自決之間「彈出彈入」。

姚松炎尋日接受查詢時話，佢一定係接近非建制，只係唔想畀人簡單劃分陣營，又指自己參與專業聯盟，都唔代表係傳統泛民，亦唔代表唔支持本土自決。至於未來投票上有何取態，佢話會睇數據及民意後作出決定。話雖如此，據了解，姚松炎已經同香港眾志候任香港島議員羅冠聰，以及朱凱廸組成三人小組，三人更要求立法會大樓辦公室要設喺同一樓層，似乎係想方便照應及部署長遠合作。

提到由六個功能界別議員組成嘅專業聯盟，據了解，聯盟正向候任醫學界議員陳沛然及衞生服務界議員李國麟招手，但兩人都有工會背景，相信要等工會首肯，先至可以加入。若果兩人都成功加入，專業聯盟就會成為泛民最大陣營，到時或會成為決定性嘅一群！立法會選舉一完，非建制唔同板塊就立即作出整合，究竟整合之後能唔能夠令佢哋未來四年更有效制衡行政機關，抑或只會形成政黨之間嘅鬥爭，就要拭目以待喇！