中環出更：宣傳車霸傷殘泊位黃潤達捱鬧
立法會選舉曲終人散，街工梁耀忠轉戰超級議席，成功連任，但黨友黃潤達接棒出戰新界西直選就落敗。唔知係咪落選之後冇晒心機處理選舉善後工作，有市民發現街工一部宣傳車前晚亂咁泊車，泊咗喺油麻地一個傷殘人士專用泊車位，搞到隨後嘅傷殘人士冇位泊車。網民發炮鬧爆街工唔係傷殘而係「腦殘」，而黃潤達事後即刻知衰道歉，仲話返去會提醒司機唔好再犯。
認衰指司機冇為意
黃潤達話，前晚個司機將宣傳車駛到油麻地時，需要落車拎少少嘢，所以就泊咗架車喺路邊，但司機就冇為意到原來個泊車位係傷殘人士專用。對於今次事件影響到市民，佢覺得唔好意思，已經將事件記錄在案，以及提醒司機唔好再犯，再犯就會作出處分喎。原來唔止商場殘廁被人濫用來聚會，傷殘人士專用泊車位都被宣傳車亂咁泊，希望街工吸取今次教訓，下次唔好再犯喇！
卓妮