中環出更：港仁中醫施藥送暖
由城中一班星級名人創辦嘅慈善機構「快樂港仁」早前舉行慈善晚會，身兼「快樂港仁」執行董事嘅潮屬社團總會會董林月萍（Moray）有份做活動搞手，一班「家己冷」都抽空去捧場。Moray話，「快樂港仁」喺深水埗成立咗「港仁中醫服務中心」，免費為非領取綜援基層市民贈醫施藥，佢認為呢班冇綜援、冇公屋等俗稱「Ｎ無」人士好值得關注，所以瞓身籌款為佢哋送暖。
講到中醫中藥，港人都算係天生擁躉，由老火湯到涼茶，幾乎個個都識幾招食療傍身。不過，讀番書嘅食物及衞生局副局長陳肇始就自嘲一啲都唔養生，細數自己「罪狀」包括飲凍嘢、夜瞓等。佢仲話，身邊女士個個都飲暖水，形容世界上已經好少人飲凍嘢喎！不過，佢唔理咁多，一於奉行「既來之，則安之」嘅阿Q精神。
劉文煒嘆中藥港淪口號
香港工業總會理事兼香港第一藥業董事長劉文煒都有出席，佢做中藥批發十幾年，但唔係做傳統藥材買賣，而係科學化生產嘅中藥顆粒。佢話，傳統煲中藥三碗水煲剩一碗水嗰種方法唔夠科學，所以科學化研製嘅中藥發展潛力大。講起香港回歸後一度提出發展中醫藥業，但係提一提「中藥港」口號之後就講完，佢搖晒頭話，原本以為香港具有發展中醫藥嘅優勢，可惜港府官員唔知點做，亦唔聽人講，結果連內地中醫藥都超越咗香港，真係可惜。
卓妮