政情：公民講場：勞資標時分歧 張建宗「剝花生」

標準工時委員會第二階段諮詢就快完結，政府一直被指偏幫商界，用種種數據「靠嚇」。有勞工團體尋日就公布一項有關工時嘅調查，發現近九成受訪打工仔每周平均工作時數多過五十一小時，其中從事保安、零售、飲食同安老行業嘅打工仔工時都比較長，有逾五成打工仔更加認為冇能力同僱主協議工時。標準工時委員會早前提出有關以「合約工時」代替立法規定標準工時，擺明係想將責任推畀僱主同打工仔，等佢哋自己拗手瓜。勞工及福利局局長張建宗如果最後只係接受「合約工時」建議，即係等同坐喺擂台邊一路剝花生，一路望住弱勢打工仔點樣硬食喇！