政情：搶立會主席 建制爭崩頭
新一屆立法會十月先開波，但建制派議員已做好前期工作，包括搵人做新一屆立法會主席。外界一直盛傳，今屆內務委員會主席梁君彥最大機會接任主席一職，但近日傳出暗湧，有指新民黨葉劉淑儀、民建聯李慧琼都有機會同梁君彥一較高下，而最新消息係自由黨張宇人都希望藉泛民不滿梁君彥嘅情緒，拉攏泛民支持佢出選新一屆立法會主席，主席之爭七國咁亂。
張宇人衝擊博安慰獎
有建制派議員透露，近日聽聞曾做過財委會主席嘅張宇人，下屆若成功返回議會，就會競爭立法會主席之位。有指張宇人咁大想頭，係因為泛民最近吹起Anyone but Andrew（除梁君彥以外，其他人都可以）嘅風，張宇人覺得可以食住條水更上一層樓。不過，亦有人話呢個只係緩兵之計，目的係希望衝擊不成，都可以分到個安慰獎，即係有機會畀張宇人做內委會主席，呢個係佢一直夢寐以求，但今屆爭極都爭唔到嚟做嘅位。
自由黨中人承認，張宇人的確打算出選新一屆嘅立法會主席，但目前仍然係言之尚早，若果九月立法會選舉之後，該黨可以有七至八個人成功當選，而泛民亦有唔少於今屆嘅議席數目，先至有勝算。佢又坦言，若果失落主席，相信張宇人唔抗拒出任次一級嘅內委會主席。但其實，就算操盤人真係唔畀梁君彥做主席，都仲有葉劉淑儀同李慧琼兩個選擇，主席個位點都輪唔到張宇人。
圍威喂分餅仔難作準
至於內委會主席一職，建制陣營就話以新論壇馬逢國同李慧琼嘅機會最大，張宇人相對機會較細。講到尾，其實建制派大部分人都希望張宇人可以再次出任財委會主席，事關佢早年出任財委會主席時，成功以金鉸剪阻止泛民拉布，都叫有功勞，更加重要嘅係呢個係「三煞位」，做咗會影響選情，都係畀功能界別出身嘅張宇人最為妥當。
仲有一點要提嘅，就係張宇人或自由黨都算漏咗操盤人嘅心意，依家班建制派都只係自己圍威喂分餅仔，屆時操盤人發功，又可能有另一番景象，所以大家都係拭目以待喇！