- on.cc 東網主頁
- 3月28日 (五)
香港貴州商務促進會早前舉行首屆就職典禮，由「電剪大王」計佑銘太太計魏鳳英出任創會會長，好多中港政商界人士去撐場，包括福建幫活躍分子楊孫西、盧文端同福建社團聯會第一副主席盧溫勝（Vincent）。Vincent同盧文端唔止同姓，個樣仲好似，唔知兩人有無親戚關係呢？Vincent笑笑口話，佢哋的確係親戚，亦有好多人話佢哋好似樣，雖然佢比盧文端只年長一歲，但論輩分就係盧文端嘅堂叔添！
Vincent家族做珠寶生意，佢已係第三代，當日計魏鳳英戴嘅翡翠鑽鏈就係佢公司嘅出品。同場仲有中華廠商聯合會會長李秀恒（Eddy），Eddy一向鍾意收藏，最近中港經濟差，照計少咗內地投資者出嚟鬥買古董，Eddy咪可以趁機執平嘢？點知Eddy話人民幣貶值愈貶愈有，今年反而多咗好多內地人買古玩收藏保值。
舊年就真係冷清啲，出現行內人講嘅「揀漏」良機，即係執平嘢，Eddy就用唔使二千萬元買到一件翡翠筆筒，價錢平咗大約三分一，真係執到寶。
同場仲見到「糧油大王」李廣林兒子李豐年，佢專程去支持促進會副會長吉爾昶。計魏鳳英雖然移居香港近三十年，但係好懷念家鄉嘅好山好水，每年夏天都會返去三木河玩漂流，佢大讚當地河水好清，有次團友唔小心撞穿個頭，結果淨係用水洗一洗，竟然冇發炎，令人嘖嘖稱奇。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
