政情：禾稈冚珍珠 區諾軒係太子爺
一向都呻窮嘅民主黨（白鴿黨），原來有「乳鴿」係零售太子爺！白鴿黨區議員區諾軒早前向南區區議會申報，指自己出任零售公司裕順行嘅合夥人。原來佢係中小企的太子爺，家人多年來經營售賣時裝嘅公司，坐擁四間分店，估唔到佢唔聲唔聲，其實係「禾稈冚珍珠」！
強調體驗過前線工作
區諾軒接受查詢時透露，裕順行係家人經營嘅時裝零售公司，成為合夥人只係方便協助處理業務，暫時自己主要負責同外國品牌傾入貨同特許經營嘅問題。佢話並唔係一開始已經做中層工作，強調自己曾喺店中做暑假工，用咗整個暑假「賣衫摺衫」，體驗過前線嘅工作。
咁幾時會接手家族生意？區諾軒就笑稱阿媽有排都未退休，反問「幾時會輪到我」，又指自己暫時唔會放棄政治工作。