政情：公民講場：嫻姐鬧爆商界 打荷包兼野蠻

勞工界多年來一直批評強積金對沖機制，即以強積金僱主供款抵銷長期服務金及遣散費嘅安排係打僱員荷包。香港工業總會名譽會長劉展灝尋日出席電台節目時講到，無論政府、工會或社會人士都話對沖機制沖走強積金儲蓄，「用『沖走』就好似打咗打工仔荷包咁」，認為呢個講法絕對係錯，仲話呢啲儲蓄係僱主已經付出咗畀員工，只係員工提早拎咗筆錢啫。同場嘅工聯會立法會議員陳婉嫻（嫻姐）梗係唔同意啦，仲反駁話︰「你企喺度郁都唔郁，唔睇對方情況，唔進入個問題去傾就打鑼打鼓反對，畀人野蠻嘅感覺好濃！」商界同僱員都要保住自己荷包，睇嚟都好難達成共識嘞。