政情：今日你上鏡：梁智仁愛犬 做唔成醫生

得意嘅小狗人見人愛，療愈功效有時超過藥物，所以唔少寵物主人都樂意訓練愛犬做「狗醫生」。醫院管理局主席梁智仁有一頭可愛程度爆燈嘅七歲明星狗Miss Muffin（鬆餅小姐），係拉布拉多犬及富貴犬嘅混血兒。梁智仁笑笑口話，鬆餅小姐好出名，有時帶愛犬行山，遊客都爭相影相，而佢更將愛犬萌樣設定為手機背景圖片。見佢講起隻狗就停唔到口，咁有無諗過訓練鬆餅小姐做狗醫生？梁智仁就話，幾年前佢太太都嘗試過，但因為條件好嚴格同複雜，所以最後都係作罷。