挑剔人哋好容易，反正隨口噏又唔使負責任，例如模特兒踩入影壇同樂壇，有人就話佢哋只係得個樣，歌藝一啲都唔掂。其實做模特兒或做歌手，兩者冇矛盾，好似內地模特兒王爾琳咁，天生火辣嘅佢為咗唱歌，背後所付出嘅努力又有幾多個人知道呢？
喺北京出生嘅23歲王爾琳，英文名Darling，擁有俄國血統，五官相當標致，36D激凸上圍配合24吋蛇腰，不論樣貌同身材都相當有睇頭，憑住先天優秀條件，令佢足以喺內地模特兒界站穩陣腳。但原來入行前，佢從未諗過成為模特兒。爾琳出生於音樂世家，自細受到家庭環境薰陶，對音樂充滿濃厚嘅興趣，而佢亦擁有一把甜美動人嘅歌聲，就係咁，憑住先天嘅優勢及後天嘅努力，熱愛音樂嘅佢成功考入中國音樂學院，主修鋼琴同聲樂。
本嚟大家都以為佢會喺音樂界發展，點知一次偶然嘅機會下，佢接觸到模特兒工作，初時佢抱住玩樂嘅心態嘗試一下，由於佢外表實在太索，甫出道備受各方嘅注視，先後喺多本著名時裝、潮流、男士及汽車等雜誌上亮相，更進軍寫真界推出一系列性感寫真，自然流露潛藏骨子裏嘅誘人魔力，難怪佢被網民喻為新一代寫真魔女。
正當大家以為爾琳喺模特兒界取得好成績，專注於模特兒工作時，其實佢從未放棄成為歌手嘅夢想，喺從事Model工作期間，佢一直未離開過音樂，不但喺音樂比賽中獲得最具潛力獎，又喺蒲公英歌手大賽中獲得黑龍江賽區銀獎，而最好嘅成績，就係喺網絡音樂比賽中奪得冠軍。由於歌藝備受肯定，令佢決心進軍樂壇，自資推出唱片，受歡迎歌曲分別有《祝福》、《不要騙自己》、《搖搖晃晃的愛戀》等。
講到發展路向，爾琳唔單止得模特兒同音樂呢兩條路，皆因憑住出眾嘅外在條件，獲得影視製作公司嘅青睞，邀請佢拍攝多套電視劇。由於佢表演經驗豐富，喺鏡頭前一啲都唔緊張，加上佢學習能力高，演技大大提升，備受導演讚賞。及後，佢獲得唔少電影演出嘅機會，雖然唔係做女主角，但憑住佢嘅毅力，相信未來會有更多嘅演出機會。對於一位新進模特兒、歌手同演員嚟講，呢張成績表唔錯。
簡介：擁有魔鬼身材嘅王爾琳，往往因為美艷嘅樣貌及前凸後趷嘅身材，令大家忽略佢喺音樂上同演戲上嘅才華。想知道呢位內外兼備嘅索模，仲有乜嘢迷人之處，就要Click上佢嘅微博睇睇。
網址：http://weibo.com/wangerlinanna?is_hot=1
出生地：北京
身高：170cm
三圍：36、24、36
撰文：魂