外號「吳得掂」嘅教育局局長吳克儉上任以來風波不絕，除咗被批評政績欠奉，更加因為全港性系統評估（TSA）問題令民望跌入谷底。教協前會長、教育界前立法會議員張文光尋日出席節目時就力數吳得掂不是，更加將佢同前局長孫明揚（孫公）比較，話孫公在位時解決多個問題，而吳得掂做足四年但係就一事無成，應該下台喎。
出任教育界立法會議員超過二十年嘅張文光，曾經同多個教育局局長交手，佢不點名評價過去多位局長，指有官員今天批評政府時非常漂亮，但做局長時卻是卸膊大王；有官員非常熱心，但熱心過頭令教師受傷，傷害到今天未能完全解決。佢又話，有官員喜歡權在我手，用權力凌辱教育界嘅人；亦有官員雖然唔係有好大野心，卻能解決問題。
張文光特別開名讚孫公，話佢接任局長時矛盾處處，但仍然搵共識解決問題，紓緩咗教改帶來嘅傷害。至於吳得掂，張文光形容佢令人灰心失望，個人一事無成、見記者時讀稿、寧願去日本旅遊都唔聽家長對於TSA嘅觀點，呢種態度加上四年來一事無成，所以應該要下台囉。