中環出更：蘇錦樑習武 三分鐘熱度
立法會尋日通過「拉布」多時嘅《二○一四年版權（修訂）條例草案》休會待續議案，意味政府撤回草案，版權修訂條例第二度胎死腹中。商務及經濟發展局局長蘇錦樑（Greg蘇）唔使再為版權條例留港奔波，上月就飛赴韓國參觀當地流行音樂舞蹈學校，仲自爆跟舞蹈老師學咗幾下招式，回港後當然無下文啦。其實Greg蘇不但推銷版權修訂條例有頭威無尾陣，佢自細習武一樣都係半途而廢。
想辦「演藝中學」
Greg蘇自爆細個都食過吓夜粥，師承知名國術師傅陸智夫學習白鶴拳，但學咗一個學期就放棄，之後轉學太極同詠春，統統都半途而廢，自言唔係習武料子喎。
講起上月訪韓跟隨導師習「舞」，Greg蘇發現韓國、美國都有中學開設專業演藝培訓課程，佢回港後已經急不及待拉埋教育局局長吳克儉探討喺香港開番間嘅可行性。不過，根據Greg蘇往績，版權修訂條例、港視發牌全部都搞到唔湯唔水，睇怕開辦「演藝中學」都好快「就此作罷」。
卓妮