考考大家，捲入離奇換樓醜聞嘅民政事務局常任秘書長馮程淑儀，同前政務司司長許仕仁、前廉政專員湯顯明有乜共通點？冇錯嘞，佢哋除咗一樣涉貪，一樣被廉署立案調查，仲係前特首曾蔭權爵士嘅愛將，呢啲咪叫物以類聚、蛇鼠一窩囉。
話明係「精叻香港仔」曾爵士嘅愛將，涉貪手段當然唔簡單啦。通過官商換樓交易，馮程淑儀着數多多，除咗慳番約一百萬元樓稅、置業成本低於市價約三百萬元，仲涉嫌騙取庫房最多逾萬元差餉寬免添，馮氏夫妻眉精眼企，生財有道，真係唔服都唔得。
係人都知，近幾年嘅財政預算案推出差餉寬免，而寬免上限係以每個應繳差餉物業單位來釐定，若差餉繳納人將兩個單位打通使用，應繳差餉單位數目就由原先嘅兩個減為一個，即係只可享有一份差餉寬免額。殊不知，馮程淑儀三年前以低於市價換入兩個相連豪宅單位，其後將單位打通，但就一直冇向差餉物業估價署申報，明目張膽享受雙重寬免。以最新財政年度計算，兩個單位扣除四季差餉寬免後，每個單位一年最多可寬免四千元，三個年度合計最高可寬免一萬二千元，都幾和味（口架）。
馮程淑儀身為資深公務員，冇可能唔知規矩，如果咁都唔係存心鑽法律罅，着數舐盡，講都冇人信。正如立法會議員同學者話齋，交換單位本身已經係好罕見嘅交易，延後利益輸送嘅嫌疑水洗唔清。仲有喎，佢當初話換樓自住，點知一個屈尾十，有關單位已經掛盤放售，一轉手就穩賺二千幾萬元，家陣仲衰到連一萬幾千元嘅着數都唔放過，擺明大小通吃，貪得無厭。
好嘞，人怕出名豬怕肥，呢宗換樓奇聞搞到全城嘩然，喺多個政黨舉報之下，終於驚動咗廉署。即係咁，老廉開快撈查案係應有之義，但到底真查定假查，仲要睇過至知。事關當局每次調查涉貪高官，唔係高高舉起輕輕放下，就係死拖爛拖，真係幾難令公眾有信心（口架）。大家有眼見，「茅台換政協」嘅貪湯罪狀一匹布咁長，點知廉署查來查去得個吉；而佢嘅前上司曾蔭權爵士單畸士就仲誇張，話就話最終被廉署落鑊起訴，但過程拖咗超過三年。今次單案仲要查幾耐，真係冇人知。
講起就唏噓，香港以前係赫赫有名嘅廉潔之都，國際廉潔排名長期名列前茅，弊在近年貪官輩出，廉潔排名江河日下，令人不忍卒睹。講多無謂，行動最實際，香港廉政招牌仲保唔保得住，就要睇廉署把劍係咪磨得鋒利嘞。