自細就聽到人哋講話每個人都有一個夢想，只係人嘅夢想又點只得一個，單係錢同愛情基本上已經有兩個。對於內地新人Elma夢嚟講，最希望成為一位炙手可熱嘅模特兒，為咗達成夢想，究竟佢可以去到幾盡呢？
內地有唔少模特兒都堪稱天使同魔鬼嘅混合體，簡單嚟講即係同時擁有天使面孔同魔鬼身材，不過可能有人覺得呢種稱呼未免用得太濫，但係用嚟形容23歲嘅Elma夢，相信唔會有人會有異議。喺上年10月出道嘅佢，雖然唔算太年輕，憑住俏麗又萌味十足嘅樣貌，成功突圍而出，配合前凸後趷嘅身材，名副其實係天使同魔鬼嘅化身。
阿妹擁有如此出眾嘅外形，當然唔可以暴殄天物，出道冇耐，便推出超性感寫真，除咗用雙手遮掩迷人巨乳外，更穿着喱士底褲，若隱若現嘅場面，無比誘人。呢種魔鬼誘惑嘅性感演出，配上純情氣質，兩者之間嘅反差，獲得極大回響，人氣直線飆升。除咗寫真集備受追捧外，攝影工作亦愈嚟愈多，同時佢喺唔少平面媒體上亮相，對於一位出道半年嘅模特兒嚟講，呢個成績超出預期。
初出道就獲得極佳成績，但係Elma覺得並唔足夠，或者因為感到自己嘅硬實力不足關係，所以佢忙於拍攝工作嘅同時，每日堅持跑步鍛煉身體，夜晚更會去練舞，從中不但睇出佢對自己有相當高嘅要求，更可以體會到一位模特兒嘅成功，並唔係單憑迷人嘅外形同埋性感嘅演繹就得，背後所付出嘅汗水更係不足為外人道。據佢講之所以咁積極鍛煉，目的不僅為提升個人能力，亦因為佢嘅體質屬於易肥一類，為咗避免身形變得圓潤，故此佢強迫自己不斷操練。
究竟呢種鍛煉有幾咁辛苦呢？佢喺微博上表示每次練舞前拉筋，對腳都會有種折斷嘅感覺，痛到忍唔住流眼淚。另外，佢又表示經過日間嘅操練後，夜晚仲要忍受肌肉痠痛繼續練舞，真係睇唔出外形如天使嘅佢，性格原來咁堅毅。雖然佢個性堅強，但人哋話晒都係女仔，因此佢不但經常喺微博上分享自己嘅辛酸，同時大發嬌嗲。靚女詐嬌，粉絲梗係唔會唔出聲啦！好似佢早前表示「真不懂為啥現在沒有喜歡胖子了。」作為粉絲知道女神一直埋怨自己容易肥，故此佢哋即刻留言稱縱然女神肥咗少少，只係睇起嚟仍然咁迷人，女神一聽到佢哋咁講即時甜到入心啦。
簡介： Elma夢呢個藝名咁特別，聽過一次以後都會記得，但係講到易入腦，就點都比唔上佢出眾嘅外形，純情氣質加靚樣，配合玲瓏浮凸嘅火辣身材，試問有邊個男士唔會被佢迷倒吖？想知道女神嘅近況的話，拿拿臨去佢嘅微博睇睇啦！
網址：www.weibo.com/u/2349554947?is_hot=1
出生地：天津
身高：175cm
三圍：37、26、37
撰文：魂