「對面只有知心友，兩旁俱無礙目人」，在官場，你想搵到啲咁正能量嘅正義朋友，恐怕是「三十晚上看月亮——沒指望」。高薪養廉，在新加坡行得通，在香港卻行不得也哥哥！皆因人性好貪，而特區政府特別多「為貪而生」嘅高官！
前政務司司長許仕仁因貪腐而入獄，前廉政專員湯顯明也因涉嫌假公濟私一度被廉署調查，家陣輪到民政事務局常任秘書長馮程淑儀，被踢爆涉官商換樓。本報進一步揭發，馮程淑儀涉嫌未有主動向差餉物業估價署申報涉事相連單位已被打通，變相可多收政府一份差餉寬免，三年來涉款最多一萬二千元。
當然，相對佢之前所慳嘅幾百萬元差價同稅款，區區萬多元認真「濕濕碎」，之不過，「為貪而生」嘅高官就係乜都要舔到盡。
「職繁而身逾逸，官大而事逾少」，證諸現今特區政府官場，可謂傳神寫照。
馮程淑儀呢單離奇樓換樓醜聞帶出許多官場軼事，身為高官，果然「職繁而身逾逸」，馮氏夫婦過去買賣物業達二十次，合共賺逾半億，確係生財有道，官大傳出的訊息係最叻炒樓，難怪本報「正論」詰而問之：政府高官一味不務正業，又怎麼會將心思放在本職工作之上？
馮氏夫婦涉及「官商換樓」、「延後利益」卻一味「詐唔知」，一見記者就「奪命狂奔」。希臘神話有個故事，話說代達羅斯用蠟做了羽翼要逃離克里特島時，因飛得太高，雙翼遭太陽熔化而跌落水中喪生，被埋葬在一個海島上……要把歪理說成真理，就如蠟做的雙翼，豈能遠走高飛？怎會有完美結局？老朽剝住花生等睇廉署如何為下一代共建「廉潔將來」。