政府近年積極發展資訊科技，各部門亦順應潮流推出多個手機應用程式（App），根據創新及科技局回覆立法會議員就財政預算案嘅提問，政府各部門近兩年一共開發超過二百六十個手機App，預計本年度會開發十八個App。其中最少人下載嘅係衞生署「哺乳Mum咪知多啲」App，只有九人次下載。最多人下載嘅係香港天文台「我的天文台」App，截至今年二月底已有超過五百五十萬人次下載。
最少人下載嘅衞生署「哺乳Mum咪知多啲」App，喺今年二月廿四日先正式上架，截至二月廿九日只有九人下載，上架只有五日，下載人數少都算係情有可原。
不過，土木工程拓展署嘅「綠化斜坡——優化社區」應用程式就認真要檢討吓，上架半年都係得四十一人次下載。至於民航處「亞太地區民航局局長第五十一次會議資訊中心」App、以及斥近四十五萬元開發與兒童權利有關嘅政制及內地事務局「童約小手尋」App，都少於三百人次下載。
政府資訊科技總監辦公室話，一直有支援各局同部門開發切合用家需要及易用嘅流動App，當局會繼續鼓勵各局同部門透過不同渠道加強宣傳，以增加流動應用程式嘅使用量及下載量。